Автор - Ркаил Зәйдуллин 

   Агач кисүчеләр урманнан Шүрәле тотып авылга алып кайталар. Урман иясе кунактан кунакка йөри, Казан журналисты аның турында мәкалә яза, Шүрәлегә паспорт тапшыралар. Аңа багышлап музей ачарга, Фәннәр академиясендә симпозиум үткәрергә, партиягә кабул итәргә, депутат итеп сайларга җыеналар – болар хәлнең абсурдлыгын тагын да көчәйтә. Кешегә әйләнеп баручы, үзенең табигый гадилеген, игелеген югалткан Шүрәле образы безнең гасырдагы татар кешесенең эчке халәтен чагылдырган призмага әверелә.

   “Пачпортлы Шүрәле” – җәмгыятьтәге гаделсезлеккә, ялганга, көнчелеккә, комсызлыкка, һәрнәрсәнең сату-алуга корылуына, телнең, традицияләрнең, татар халкына хас иң матур сыйфатларның юкка чыга баруына, милләтнең үз киләчәге өчен көрәштән читләшүенә тирән борчылудан туган спектакль.

  Спектакльнең премьерасы 2023 нче елның 29 нчы сентябрендә булды.

  Спектакль “Бердәм Россия” партиясенең «Кече Ватан мәдәнияте» (“Россиянең кече шәһәрләре театрлары” юнәлеше) федераль проекты ярдәмендә куелды.